孖仔組合Soler同前經理人公司的合約糾紛搞足幾年，上月法庭頒令Soler破產，但無損剛做爸爸的細孖Dino心情，大前日是他愛兒Damiano滿月，Dino更漏夜從深圳趕返港與囝囝一起慶祝，Dino笑說自己照顧妻兒技巧純熟，可撈過界做陪月。
組合Soler的細孖Dino於09年與圈外女友黃麗施（Nancy）結婚，兩人早前成功造人，Nancy上月5日剖腹誕下龍仔Damiano，由於Nancy血壓偏低，Dino即細心照顧她及囝囝。
上月Soler與前經理人公司蜂鳥音樂的合約糾紛在高等法院聆訊，Soler因欠前公司近600萬，未能如期還款，最終法庭對Soler頒下破產令。不過，Dino未有因此影響做父親的心情，大前日囝囝滿月，剛完成新英文專輯的Dino即漏夜從深圳趕回港與妻兒慶祝。
Dino提起愛兒就現出一副慈父樣，他更說連妻子喜歡吃甚麼也忘記得一乾二淨：「我滿腦子都係個仔嘅食譜同照顧佢嘅方法，每日睇住佢嘅變化就最開心。」
照顧妻兒一腳踢
問Dino會否怕被愛妻投訴偏心，他笑說太太不會詐型，更表示太太坐月時，他要工作之餘，亦要負責做家務，他說：「今次做埋陪月，除咗有時經理人會嚟幫手外，基本上都係我一手負責照顧老婆同仔，我記得晒老婆坐月時要注意嘅嘢，仲日日都煲魚尾木瓜湯畀佢飲，真係可以撈過界做埋陪月。」
採訪：林妃