貼盃賽睇戰意，聯賽信賽績、近況鬥兵源；英超今晚戲碼略為平淡，博彩上也無謂過份重視兩大近況走低嘅倫敦名牌車路士同阿仙奴嘅直播波。英國波未到瘋狂嘅聖誕新年快車期，唔難刨到值博率合理嘅正常賽果。呢期貼英冠信心回來，就先取作客英冠大魚腩彼德堡嘅升班要角米杜士堡，單W暫有1.9倍。
上周12場英冠埋單計共有43個入波同7個熱W，對呢個打得極密、爛場處處嘅「地獄」聯賽，兩項數據實屬難得，原因當然與近期比賽較疏有關；更難得係，全部球隊再有近一周休息時間喺今、明登場，相信可信賴上周表現作投注參考。重心反而睇中下周中唯一有波打嘅米杜士堡，雖然該隊有英聯盃作客史雲斯嘅8強戰要應付；但相信冇領隊會儍到為一個盃仔留力，而輕視現今仍穩站英冠前列，博季後升班擸英超巨獎嘅有利位置。
米杜士堡09/10球季回降英冠後，前3屆排名分別係11、12同第7位，上季僅與升班附加賽無緣；今季開得唔錯暫排第4，好攻得只嫌失波多，早輪曾聯賽作客4連勝，喺英冠真係一啲都唔易，也證明具有升班實力；但近兩仗作客連敗，包括負予長期企喺前3嘅卡城同上周五兩度領先下被伯明翰末段反勝3:2，敗績尚可接受。今次作客對手係「英冠昆軍」彼德堡，近年由費Sir之子達倫斷斷續續掌帥；攻聯賽，最信持續數據，呢班波喺英冠擺明唔夠班。09/10球季已試過一升即包尾回降英甲；落番去一屆又回升，但上季以尾7捱過終點，今季又打回原形，沉淪榜末，打了20場敗率達75%，主場更劣，10戰2勝8負。小球會組軍以借度日，彼軍剛傷了個從西布朗借得、長期擔正嘅小英國腳比拉希奴，正鬧前鋒荒，但明年轉會窗開放前神仙難救，米堡客W穩開；睇遠啲，彼軍下周作客更強嘅卡城，呢啲投注寶藏，直播波未必有。
次選，英超波，升班馬對戰修咸頓迎雷丁，前者近況轉好亦不足以過份熱捧。英冠理論：花無百日紅，雷丁遇同級隊成冷減壓，博到今季第2W唔奇，上仗主場入到紅魔3球夠亮麗。修頓對上兩場主場聯賽只係打謝「殘紐」、和諾域治，唔足以喺今場熱到得1.85倍主W；雷丁上季喺英冠兩戰對手得1勝1和，作客贏3:1，入球係今場或會同列正選嘅方祖同羅拔斯，大家人腳熟口熟面，五五波，捧[+1]安心。文：蘋果波神
（下次見報日期：16/12）