曼城喺聽日嘅曼巿打吡之前有好消息沖喜！因為據《米蘭體育報》報道，曼城前鋒巴洛迪利同佢女友拉菲娜嘅愛情結晶品，已經喺周三出世，仲係囡囡嚟，起名為琵雅（Pia）。拉菲娜原本嘅預產期係喺下周一，今次Pia可以話早咗出世，唔怪得佢出世時，巴神仲喺英國；不過，琵雅出生時好健康，重3.8公斤，據悉，Pia喺意大利文中，有「誠心」同埋「虔誠」嘅意思。