嗚嗚！唔抵呀，上個月以為自己識得摸頂走人，於是將2010年買入的杏花邨單位沽出，仲夠晒期唔使畀額外印花稅，表面上，係賺咗百幾萬，成世女未試過銀行戶口有咁多錢。但是出面個市況都癲癲哋，想換番差唔多質素嘅樓，原來賺到都唔夠畀首期，睇多兩睇，心都慌晒。點算呢？好彩荃灣個老家仲喺度，可以搬返去住，希望個市早日回落，等我可以上返車，唔使再打擾屋企人。
其實我都唔想賣樓，好鍾意杏花邨自成一國，無閒雜人等，又近返工，咁點解要賣呢？如果唔係同男友分手，想割走一切從頭來過，我都不會賣。家好後悔，有傷上加傷嘅感覺。
點知，最近見到杏花邨一個低層戶，竟然可以租到1.5萬元，呎租26.8元，我敢講，景觀一定無我個單位咁好。若果用呢個價錢去計，我將單位出租，有631呎，可以租成萬七蚊，租金回報率有4厘，都好好啦！
有層樓喺手，真係好有安全感，好過家搵來搵去都搵唔番咁上下嘅樓，擔心舊錢貶值係好難受。原來，失去了，才懂得珍惜，包括層樓同男友！
讀者 Joyce
本欄園地公開，歡迎各界來信，以450字為限，請電郵至mailto:[email protected]，
註明《家》樓民講場，請留聯絡電話。編輯保留文章的刪減權。