一個80後、現年31歲的女歌手，在現今世代，理應還有條件發一下公主病，但公主病未得閒發，抑鬱症先黐埋身。薛凱琪阿爸有心臟病，父母離異，獨女要養兩頭家，工作加經濟壓力都未算衰，還要受愛情重創，不過悲情韓劇橋段女主角薛凱琪對愛情還有憧憬：「我相信有真愛，我唔會放棄。」
撰文：魯萍
數年前薛凱琪（Fiona）的爸爸患了心臟病，家庭重擔一下子落在身為獨女的Fiona身上，要供樓又要養家，經濟、工作加上感情各種問題來襲，令本來萬千寵愛的她患上抑鬱症，更企圖自殺。如今一切雨過天青，並轉投了新公司，目標明確。
「個病係份禮物」
Fiona離開了一手捧紅她的華納唱片，結束八年合作關係，轉投黃柏高（Paco）的太陽娛樂文化，傳過她和舊公司關係變差，也曾被指反骨，Fiona解釋跳槽原因：「入行八年覺得係時候開紅館，如果我要走，公司唔會幫我開紅館，如果我諗住走，亦都唔會要求公司幫我開演唱會，場地拎咗，時間都定埋，我哋續約條件都講好晒，有口頭承諾，只係未簽約，但突然佢哋要改條件，我同屋企人商量之後，決定唔續約，但大家仲係好錫對方，離開唔一定係不和。」她坦言離開一間合作了八年的公司，初時有點徬徨，加盟新公司只有一個月，已有明確方向，現在同一時間錄國語和廣東唱片，下年會主力唱歌和拍電影。
人生總有高低得失，回顧過去八年得失，Fiona說：「如果我唔做呢行，可以得到戀愛自由，我會戀愛生仔。我得到嘅係演戲同唱歌呢份工作，呢份工畀我好大創作空間，可以幫志願團體，又可以唱正面歌去影響人，拍笑片令人開心，令人笑都係功德。」戀愛、自由和生仔對Fiona而言都是相等的重要，她覺得工作與愛情兩者之間互不可取替，但只要是真愛，就沒有任何事可阻擋。
抑鬱症康復，低潮期也過去，凡事向好方面想，其實病都不一定是壞事，她說：「我覺得個病係一份禮物，我當時好近死亡，當你好得番，之後睇所有事都會好唔同，家睇人生、金錢、感情所有判斷能力都唔一樣，知道乜嘢先係生命中最重要，原來有啲嘢係唔重要。」
黃偉文（Wyman）最近為Fiona的新歌《冷笑話》填詞，指她愛說不好笑的爛gag，Fiona不怕被笑堅持繼續搞爛gag，其實是想帶出她性格的另一面，她說：「我性格好倔強硬朗，猶如對愛情一樣，就算你唔鍾意我咩，就算我知道你係一個唔啱嘅男仔，我都會keep住鍾意你，同埋我有我自己堅持，我可以為愛情拋開一切，但又會覺得冇呢個必要，如果真係愛，又使乜拋開一切呢！因為佢會諒解，真係當我搵到一個我好愛嘅男人，佢唔會唔畀我做我想做嘅事囉！」
覓安全感男友
Fiona自言每次拍拖都以為那段是真愛，但通常事與願違，她對愛情是否仍有期待？她說：「有但唔好急，係你就係你，問點解得唔到會活得好辛苦，無論之前我受過幾多次傷害都好，我都唔會放棄，永遠相信有愛情有真愛，我係一個探測器，我唔探測好你適合我或係一個安全嘅男仔，我唔會開始，有啲我對你有好感，但感覺唔到你有安全感，我唔會去開始，但嗰份愛我亦唔會停，會keep住對佢好，我有呢份執着。」