四大會計師行嘅高層呢個月應該如坐針氈，事關國資委將會為九間一線中資股重新揀過核數師，呢九間中資股包括三大航空、電訊同埋石油公司，一年審計費少則2000萬（人民幣．下同），多則接近1億，轉去幫另一間做核數都還好，如果不幸出局，一年唔見咁大筆生意，真係裁員都有份。
國航 中移 要換核數
財政部同國資委舊年底出咗份文件，規定幫中資股核數嘅會計師行，最耐只可以做10年，華潤置地（1109）同中國海外（688）率先換咗會計師行。聽聞，呢個月輪到國航（753）、中移動（941）、聯通（762）、中石油（857）等九間一線中資股要換行。
翻查年報資料，呢九間中資股舊年嘅審計費用（連埋畀核數師嘅非審計費），以航空公司較少，由1300萬至2000萬左右；電訊公司最勁，7000萬至9600萬，中石油、中石化（386）亦要7000萬左右。
家主要由安永、羅兵咸永道同畢馬威幫佢哋核數，有「四大」高層笑言，三間行打亂做都仲好，如果其中兩間互換，剩底一間都唔知點算，只會冇得做，一年千幾萬審計費唔係少數目，何況幾千萬？聽聞「四大」已經安排好大量人手寫標書，絕對不容有失咁話。
李華華
mailto:[email protected]