證券界近年希望政府重設最低佣金制，政府一直採取哦哦嘅態度，等到代表金融服務界嘅立法會新丁議員張華峰前日提出動議，財經事務及庫務局局長陳家強終於表態say no，話喺大原則同執行上都好難行返轉頭。
反對再引入最低佣金
陳局長噚日喺立法會會議上逐點回應張華峰有關業界發展嘅動議，講到最低佣金呢一項，就話政府「認真研究過」，但係發現家重新引入最低佣金制，將要面對唔少困難，一來同促進市場競爭嘅方向背道而馳，二來可能增加投資者負擔，影響到佢哋嘅投資意欲。
執行上，陳局長就話，03年取消0.25%最低佣金之前，最低佣金制度本身已經好難執行，家陣話重新引入應該更加困難。簡單來講，咪就係政府唔會再搞最低佣金囉，撥咗出去嘅水又點收番呢？