思捷（330）業績及股價皆不振，仲要供股，一班小股東忍唔住喺噚日股東會上鬧爆主席柯清輝！最好火嘅竟然係一位年逾70嘅婆婆，佢最不滿思捷派息少：「你哋表現差就唔使講啦，又派咁少息，用咁多錢請新CEO，都未見成績，就向我哋伸手攞錢！你話㷫唔㷫吖？」全場股東即時報以熱列掌聲。
幫TVB 出晒口
婆婆鬧到興起，順勢鬧埋現場招呼股東嘅食物寒酸，又話自己喺Esprit買唔到衫，叫管理層檢討吓。老柯見慣大場面，等婆婆出完氣，先氣定神閒回應：「我都試過去Esprit買褲，但條條褲款都咁窄，穿唔落。我之後有反映過，第二年就買到喇！」照咁講，Esprit遲啲係咪會出老人家系列呢？
老柯現身，難免要講點解突然做TVB（511）獨董，佢話係TVB主席梁乃鵬邀請佢。佢覺得電視有競爭係好事，但政府都要有透明度，唔好令經營者冇晒預算先得。咁快就幫晒口，真抵請！