無綫前藝人魏駿傑近年轉戰內地市場，似乎真係搵到銀喎。有傳近日佢豪擲近千萬，喺九龍城買樓，應該係為兩歲囡囡Jessica將來入讀名校鋪路。魏駿傑07年同滕麗名分手，翌年娶咗比佢年輕廿年嘅重慶姑娘張利華，婚後育有一女。有地產代理爆料，話魏駿傑前日帶埋老婆、囡囡一家三口，到九龍城新盤匯賢閣位於旺角嘅展銷廳睇樓，諗咗一晚就扑鎚，噚日一早單拖去售樓處畀錢，用911萬買咗個10樓以下單位，呎價10352元。
單幢樓匯賢閣由細發展商捷偉發展，只得37伙，分層單位全部880方呎，一律三房，最大賣點係處於名校網。呢個盤前日突然開賣，聽講暫時賣咗五伙，首十名買家有3.75%現金回贈。