遠在Palo Alto嘅生物科技創投家安森來電，話一位生物科技專家T博士返咗香港視察，會搵左丁山食番餐飯。隔咗一日就收到T博士電話，於是與佢到上海總會，呢位矽谷博士專家幾樸素，吃午飯簡簡單單，食兩細碗葱油麪與鱔糊麪與兩隻小籠包，已經話夠晒，剩番其他食物由左丁山掃晒及打包，如果香港人齊向博士T學習，一定可以減少大量廚餘。
返港視察啲乜呢？原來T博士係皇仁仔，同班同學有鄭振耀（中大前副校長），高一班有霍泰輝（中大醫學院院長/副校長），陳偉儀（中大生物醫學院院長），師兄有兩位大學校長陳繁昌與沈祖堯，左丁山嘆一口氣：「有咁多科學精英，加埋特區政府有咁多皇仁高官，俾你班皇仁仔玩晒啦。」香港有如此人才輩出官校，倘要縮班減學生，家長應該上街抗議！博士T話佢自中學畢業就跟隨父母移民，在加州大學栢克萊分校畢業，在戴維斯分校得分子生物學博士學位，二十幾年前就發表不少文章關於E類肝炎（或稱戊型肝炎）嘅學術文章，註冊專利，之後不斷研究生物科技診斷，與朋友及矽谷投資者開設一間公司，幾年前回港在科學園設立研究室開發快速診斷病症，憑驗血可以在十幾分鐘內診斷有關人士是否患上早期肺癆、幽門螺旋菌及懷孕特徵等等等，佢再講落去，左丁山完全唔明白，請佢講啲簡單例子。
有一位朋友去年久咳不止，家庭醫生當係頑咳，吃藥不癒，後到一家私家醫院檢查，找不出特殊症狀，某晚深夜劇咳心痛，急送某港島私家醫院，一星期後驗出肺癆，立即施手術切咗半邊肺，花費了好幾十萬元。博士T話：「如果用我地嘅新方法驗肺癆，好快好快就驗出，唔駛照X光，通常X光照到嘅肺癆病狀，已屬後期，你地請菲傭、印傭要驗吓有冇傳染性肺癆，我地一驗就知！」如此講法，將來豈非好好生意？咁又唔係，因為香港醫療系統與別不同，內裏嘅網絡關係與決策行政程序十分繁複，新方法會「碰一碰」Establishment嘅行事習慣與思維，新科技未必可以在香港普及㗎！