孕育唔少社會精英嘅傳統名校皇仁書院今年150年校慶，星期日（9日）喺會展筵開190席賀一賀。皇仁仔會上台輪流獻技，重頭戲首推包括新、舊食物及衞生局局長高永文同周一嶽，以及中大校長沈祖堯同中大醫學院院長霍泰輝呢四大名醫，當住2,400名來賓前合唱；如果大家聽到有咩頭暈身㷫，擔保有其他皇仁仔名醫即場睇症急救。
「政壇技安」周一嶽嘅歌喉，大家都「聽出耳油」；但佢嘅另外三位拍檔，就甚少開金口，唔知會唔會聽到大家唔捨得走？今次技安仲有獨唱環節㖭呀。
福臨門五哥拍賣酒席
名醫獻唱，六位「皇仁黨」立法會議員石禮謙、湯家驊、梁家騮、胡志偉、梁繼昌同盧偉國就上台玩「鬥嘴」。聽聞律政司前司長黃仁龍亦有表演，但騷乜哥利，就先賣個關子。
晚宴亦有拍賣環節，愛錶之人、皇仁仔兼前嶺大校長陳坤耀就捐出10隻陀飛輪拍賣；福臨門大股東五哥徐沛鈞最近捲入家庭爭權官司，但身為皇仁仔嘅佢亦捐出福臨門酒席拍賣。
據知當日老中青三代皇仁仔、退休同現任嘅皇仁教師，以及歷屆校長都濟濟一堂。最年長係1930年代畢業嘅九旬長者，最年輕就係只有13歲嘅皇仁Form 1仔。為咗將皇仁仔帶回銅鑼灣校園現場，當日會場亦會佈置成翻版「皇仁校門」，等校友「重返校園」，亦提供限量150周年手機套、呔夾同皇仁呔畀校友購買。
mailto:[email protected]