去到12月初，港股仍未捨得收爐，內房股仲有得升，其餘股份普遍日升日跌，總括嚟講暫時市況偏穩。
不過，就算閣下有心炒股，芬佬陸續放假都費事同你落場博，下半個月點都會轉靜，股市「十個牛皮九個淡」，到時有埋美國財政懸崖做藉口，照計畀晒大戶機會去震倉。如果下周港股走勢靚仔，投資者信心番晒嚟，炒中央刺激經濟概念之下，散戶驚死買唔切貨，到時不妨反手沽啲跟大市嘅股票，然後等震倉再執平貨。
展望出年，揀股方向不外乎政策受惠股、行業轉運股或者行業贏家。轉運股有晉佳最近介紹嘅水泥股，內房股都唔會差；行業贏家就留意中國無線（2369）。近幾年手機潮流幾經轉折，iPhone出現，中國無線未被砌低，喺平價機市場再度跑出，睇嚟公司有一定軟實力，相信喺蘋果進軍平價手機市場之前，中國無線有條件打橫行。
現階段仍可小注買
國產智能手機行業目前並唔好賺，個別手機供應商仲要蝕錢，至於中國無線生產嘅酷派手機，能夠同內地電訊運營商合作，收到運營商嘅補貼收入，保得住有利潤，同時公司又薄利多銷，令盈利可以有增長。中國無線今年上半年純利升28%到1.53億元人民幣，每股盈利7.1分，明顯低過收入嘅1.05倍增幅，但盈利上升反映薄利多銷策略湊效。佢今年第三季國產智能手機市佔率排第三，只係低過三星同聯想（992），出年更有機會贏到OEM手機行業一哥地位。既然係未來行業贏家，即使現階段行業生態環境差啲，都可以考慮買入。
高盛估計，中國無線下半年每股盈利達8.9分，預測市盈率14.8倍，出年繼續搶佔同業市佔率，收入同盈利有機會上漲，換言之市盈率有條件再下降。
晉佳上個月推介中國無線，至今股價走勢趨向反覆，進入整固階段，雖然現時難講整固已經完成，但現階段仍可以小注買，目標價3蚊，跌穿2.20元止蝕。
晉佳
本欄逢周一、三及五刊出