錢雋永，80後，香港酒吧業協會副主席。自小愛音樂，為追星到酒吧兼職，27歲做老闆，賺第一桶金。入行十年，經歷行業由盛轉衰，大半年前，結束一盤生意，向區議會申請撥款，連續三個月，一星期七日、晚六朝三微服出巡，為行業「Q嘜」認證東奔西走，只因想趕及政府大肆整頓酒吧業前「自我審查」，向拖垮行業的地獄吧說不！記者：呂麗嬋
「自細鍾意音樂，畢業第一份工，就喺琴行做。嗰時有個客人，好好傾，佢邀請我去佢開嘅酒吧聽歌，話好彩嘅話，有機會見到大明星！嗰時細個，可以追星，梗係興奮，落到去，真係畀我見到譚詠麟，仲有哥哥（張國榮）！開心到不得了。呢個帶挈我見到心儀歌星嘅客人，後來變咗我師傅，佢就係酒吧協會主席蔡傳玉。我成日講笑，話我嘅酒吧生涯，係由追星開始！
由兼職打雜做到老闆
小時候，我算係個乖仔，屋企管得嚴，成日話酒吧品流複雜。但第一次去酒吧嘅經驗，實在美好，見到靚人，又有音樂，好似發現咗另一個世界。之後，我朝早返琴行，夜晚偷偷哋去酒吧兼職，由打雜、侍應做到吧台，甚至客串打碟。喺酒吧，見到唔同行業嘅人，聽到好多故事：傾成一單重要生意、情侶由瞹味到嗌分手，充滿悲歡離合。
四年前，師傅問我有無興趣自己管理一間酒吧。嗰時，我只有27歲。屋企人梗係唔贊成，師傅見我好想試，就話你肯學，我借錢打本畀你做，我二話不說，就去馬。佢係老行尊，教我點樣改菜譜、更換酒吧佈置；客人醉酒鬧事，點樣見招拆招。如是者，間酒吧喺半年內轉虧為盈，之後，仲賺到我第一桶金。
開局順利，梗係心雄。只係好景不常，近一、兩年，租金暴升，好多酒吧為吸客，淪為劈場。每逢有拉人販毒、打交嘈音投訴嘅新聞，我哋呢啲合法正常嘅酒吧，反而首當其衝；政府又話要加強規管，四面楚歌。好多老闆同我大吐苦水，佢哋大部份做咗呢行幾十年，轉行好難。我就話唇亡齒寒，不如自救，可能仲有一線生機！
搞Q嘜認證自我審查
為咗同地獄吧劃清界線，我寫咗個計劃書畀區議會，申請資源為行業搞「Q嘜」認證。我係酒吧老闆，有人質疑獨立性，既然點都要做，我索性將間酒吧頂埋手！千難萬難，終於組成咗支四人視察小組，每晚分兩隊，到唔同酒吧視察，明巡暗放蛇。試過揸住架車，一晚巡咗十間，由夜晚6點，巡到凌晨3點幾，變咗無人工收嘅食環署。
有啲人話我傻，頂咗盤生意畀人搞乜嘢Q嘜，我哋唔係執法部門，真正嘅地獄吧，根本唔會參加；又俾人質疑你咁後生，有乜嘢資格做評審，吃力不討好。
但萬事起頭難，全港有1,200幾間酒吧，家，起碼有130間認同咗個制度，珍惜自己係Q嘜！要擴大到全港、要市民認同，仲長路漫漫，但起碼係好嘅開始，你話係咪？」
政府收緊限制敲喪鐘
樓上酒吧頻頻被揭無牌或違法經營，食物及衞生局局長高永文，上月中高調到尖沙嘴山林道及中環雲咸街，巡查附近的樓上酒吧，實地了解酒吧的安全及治安問題。並透露當局正研究進一步規管樓上酒吧，包括「打七折」限制人數，以及對續牌事宜加以規限，如限制出售酒精飲品的時間，以及營業時間內需有持牌人在場等。就政府擬收緊限制，酒吧業界普遍反應負面，擔心會掀起結業潮。