雖然仲未知幾時發免費電視牌照，但魔童已經等唔切，前幾日帶領過百藝員晒冷，宣示準備好隨時開台，同樣申請緊牌照嘅有線寬頻（1097）就一貫低調，或者等緊更好時機先開聲撐魔童。
有線上月失落未來3年嘅英超轉播權，球迷自然失望，大家又要裝番now的英超頻道，到時每月使多百幾蚊。好多人話，有線會因此流失大量客戶，收入急跌。但實情係佢哋已比幾年前聰明，年頭已經紛紛同客戶續約，綁球迷兩年，即係客戶流失可能要到2014先出現，但未來一年冇咗巨額轉播權嘅攤銷，有可能轉虧為盈。現時NAV有0.73元，股價折讓近五成，一間即將止血的公司，現價真係太殘喇！
有線近期股價走勢唔錯，9月急升至0.45元後回落，在0.40元附近已整固兩個幾月，現價買入先博0.45元，若免費電視牌有新進展，唔排除可借勢炒上全年高位0.58元，但隻股成交一向唔多，戰友宜小注怡情。
唐牛