唔單止荷李活興懷舊，一眾80、90年代大紅動作巨星合映嘅《轟天猛將》大收，連續集都有好多捧場客；原來喺足球場都一樣，英超球隊阿仙奴見上屆「國王」亨利（圖）回歸有好表現。今屆食髓知味，再次由下年1月起向紐約紅牛借用呢名法國前鋒6周，而兵工廠領隊雲格更好想呢名35歲嘅前鋒踢到季尾為止㖭！
亨利係阿仙奴歷來入波最多球員，截至07年效力兵工廠8年間共入226球；而難得嘅係喺今年1月佢趁美職聯休季，以外借身份再次投效兵工廠，風采不減當年，特別係第一場重披阿仙奴戰衣就喺英足盃射垮列斯聯，助球隊1:0勝出，睇到我求大俠不知幾咁激動。
今屆，由於兵工廠經歷雲格執教以嚟最差嘅開季，15場聯賽得5勝6和4負得21分排第10位，兵工廠當然再次向亨利招手，而佢亦有情有義，一口答應。據報，由於亨利跟操咗幾日，表現已經寶刀未老，勁過唔少在陣當打嘅球員，令雲格好想佢留效至季尾而唔係只係踢6星期。不過，如果亨利同意咁做，佢將會錯過三分一個美職聯賽季，俾你係紐約紅牛，你都唔制啦！
不過，就算有國王回歸，雲格都可能難展歡顏，因為據《每日郵報》報道，右閘沙格拿覺得球會只係肯開續約1年嘅條件係唔尊重佢，佢仲已經向隊友放晒風，話今季結束之後，就會離隊。
杜奧巴返車仔跟操
另外，同樣喺今季表現麻麻嘅倫敦英超球隊車路士，其實亦一直期待一位猛將前鋒杜奧巴回歸，而名科特迪瓦前鋒亦已經喺史丹福橋操緊；可惜，仲係效力上海申花嘅佢，只係因為趁中超休季時返車路士跟操保持狀態啫！