陳百祥（阿叻）係剛剛嘅星期一先至慶祝完62歲生日，呢頭一班圈中朋友出席咗佢喺跑馬地馬場搞嘅生日會，點知噚日阿叻又一村嘅屋企就俾人爆竊，唔知算唔算破財擋災。事緣噚日朝早8點幾左右，又一村玉蘭路嘅玉寶閣有一單位嘅女住戶報警，話屋企被人入屋爆竊，俾人偷咗800蚊現金同一部手提電話。
住所保安唔差
當警察去到現場嘅時候，就發現住係同一幢大廈嘅阿叻都俾賊人光顧，不過損失就慘重好多，除咗俾人偷咗一個旅行篋之外，仲唔見咗兩張每張價值8萬蚊嘅馬會現金券，總值成16萬，仲有一部應該係阿叻用嚟睇馬嘅望遠鏡唔見埋。
現場所見玉寶閣嘅保安都算唔差，聽嗰度啲住客講，嗰區嘅治安一向都唔差，好少聽見有打劫同爆竊呢啲事發生，希望係個別事件喎。
此外，馬會噚日就回覆話遺失現金券只要提供到詳細資料，好似購買日期或其他資料都可以補領，咁俾人偷咗唔知攞唔攞得番呢。
撰文：馮仁昭