東華學院創校校長汪國成早前劈炮唔撈，原本想今個月走人，但佢噚日出席東華活動時自爆，都係決定留低做埋餘下兩年合約，透露校方會委任兩名高層兼任協理副校長，幫佢處理校務。
點解當初想唔撈？汪校長話因為壓力大、工作忙，搞壞身子萌去意，但近兩個月師生、家長同校董會出力挽留先回心轉意，否認因不滿校董會內有人干政而辭職。汪校長為力證自己真係身子弱，噚日搵嚟保健中心醫師自爆病歷。醫師話佢血壓高兼有中央肥胖問題，中心幫佢用中西醫方法固本培元，同用針灸方法幫佢減肥，但汪校長一聽到就耍手擰頭。