港大法律學系教授陳弘毅身兼基本法委員會委員，向來都係阿爺諮詢香港法律學者嘅頭號人物。陳教授噚日舉行新書《法治、人權與民主憲政的理想》發佈會，到場見到記者人數多過法律學院學者，即時向主辦單位反映，似乎唔多like冇乜學者捧場。佢喺新書提到，03年23條立法大部份都合情合理、人大各次釋法都有理據，唔怪得受阿爺歡迎啦。
前終審法院常任法官包致金話香港法治面臨暴風雨，陳弘毅就話唔多覺；亦唔同意律政司前司長梁愛詩話法制唔係50年不變，強調香港法制50年不變係受到《中英聯合聲明》同《基本法》保障，明顯同詩姑唱反調。