正所謂，崩牙駒「猛虎」出柙，濠江即刻冇晒賊！權威到冇朋友嘅中國城市競爭力研究會公佈咗今年嘅中國城市競爭力排行榜，結果香港蟬聯冠軍，呢樣冇乜驚喜，最頂癮嘅係安全城市排名；各位觀眾，舉國最安全嘅城市就係，燈燈燈凳，澳門！
偷呃拐騙視作等閒
澳門榮獲最安全城市名銜，又關駒哥事？講笑啫！研究報告話，澳門第一係因為今年冇發生大型傷亡事故；反觀香港，上年有花園街大火燒死九個人，今年又有南丫大海難，奪去39條生命，所以連續兩年頭30名都唔入，幾乎係全中國最令人不安嘅城市。
所以話呢個報告真係堅到無倫，一個城市安全與否原來係睇一、兩宗嚴重災禍，而唔係睇平日嘅治安情況。或者咁講，呢個研究反映咗天朝學者嘅心態，佢哋覺得出街俾人打砸搶係小事，所以港客成日遇到偷呃拐騙嘅深圳，名列安全城市亞軍。
唔好話吳爽大香港心態，輸打贏要，就連內地人對個安全排名都不敢苟同。微博深圳網民「歪歪-with-hiro」留言話：「中國最安全的城市排名：1.澳門 2.深圳……30.香港，哈哈哈哈哈哈！這是要笑史我嗎！單看前2名這個榜單就已經是個笑話了。」
可能個研究太過高深喇，噚日香港幾間電子傳媒都冇乜點報道，CCTVB係咁??提過吓，結果慘被深圳網民「瑪修帕思」抽水：「Hong Kong居然在30名開外……這個排名不敢苟同，按說TVB以前不會這樣忽悠（耍弄觀眾）嘛，現在難逃同化的宿命……」