「開誠布公」呢4個字，CY得個講字。僭建醜聞一味「拖字訣」，擺出一副「騙子相」，誠信早就破產。男人以至股票，想令菲菲產生好感，誠信係最基本。
波司登（3998）上星期公佈半年少賺3%，當中男裝業務仲勁減14%。業績唔對辦，股民拋棄合情合理。所以噚日於大升市中斯人獨憔悴。不過波司登有樣好，勝在管理層夠老實，講明半年內執咗77間舖，未來大方向係繼續將搵唔到錢嘅分店關門大吉。
波司登唔止肯曲線開大聲公，同世界講「我哋真係好唔掂」，更以行動表示會如何止蝕。相比皇朝傢俬（1198）明明銷情爆差，仲死口唔認，等抽完水先認衰；波司登嘅真心「開誠布公」，管理層做實事明顯更為可愛。
要等波司登重整業務有收成，相信仍需一段時間，股價短期內仍受壓，但菲菲衷心祝你，銷售早日重上軌道。
Fifi
本欄逢周二、四刊出