湖人周二去到火箭主場，一路都帶住主隊嚟打，點知第4節俾對手反撲成功，仲喺最後1分鐘落後番轉頭。呢啲時間梗要靠全場攻入39分嘅拜恩（右）啦，佢喺最後13.3秒射入一個3分波，將差距拉近到1分；可惜之後有個反勝3分波射唔入，最後客隊輸105:107。火箭一班正選已經打得唔好，林書豪因為太多犯規只得4分、3次助攻，第4節末段仲冇得打，夏登19射只得3中有15分，咁都贏到，班後備抵讚。Kobe連埋今場，職業生涯已經累積咗29,987分；香港時間今朝對黃蜂入多13分 （now 635台今日9:00am直播） ，就會成為現役唯一一個總得分達3萬分嘅球員。