無綫以百萬獎金做噱頭的遊戲節目《決戰一分鐘》，找來19歲校花梁嘉琬（Whitney）出戰第二集，憑甜美的外形迅即冧爆宅男兼火速被起底，當時Whitney被踢爆是模特兒，因而被人質疑無綫做媒，但事後監製陳旭亮否認，並稱招募途徑絕對公平。
昨日有讀者報料，聲稱《決戰》有參賽者做媒，除了第二集的男仔Sion曾經上過《登登登對》外，大後天周日（9日）播出的第三集，會有曾參加今年USTAR的校花、現年18歲就讀理工大學的蔡嘉欣，故質疑無綫找靚女做內定參賽者。
無綫被質疑做媒
蔡嘉欣昨日接受電話訪問時否認此事：「嗰陣我哋仲玩緊比賽，係雜誌嗰邊話無綫遲啲有個咁嘅節目，如果有興趣可以參加，我咪自己上網報名，嗰陣要喺佢哋面前試玩，成功咗先可以畀我哋入選。」問有否同屆的校花校草報名，她說：「以我所知係有幾個人去報名，後來傾番先知有啲人冇被揀中，面試嗰日仲見到有其他參賽嘅組別。」
至於有否信心一如Whitney般吸引宅男，蔡嘉欣說：「唔知呀，我玩遊戲唔係好叻，所以播出嘅時間應該係好短，我唔知佢哋鍾意啲乜嘢，做番自己喇。」此外，林曉峰在前晚播出的《瘋狂歷史補習社》中，將靖難之變的明成祖變成明太祖。
採訪：葉雪