港交所（388）要求上市公司今年底前，董事會成員至少有三分一係獨立非執董，唔少上市公司要周圍搵人，有份量嘅獨董向來唔易搵，貨源有限，且多數係律師、會計師，間唔中亦有出名前高官做，賺吓退休外快，唔知係咪真係咁難搵，最近有上市公司向前公務員埋手㖭呀。
電能招方志偉入局
電能實業（006）噚日委任香港總商會前總裁方志偉（Alex）做獨董，入總商會前，Alex喺政府做咗25年，包括駐東京同紐約嘅經濟貿易職位，有幾年又做過證監會雙重存檔事宜顧問小組成員，金融、財貿知識咁豐富，應該幫到誠哥手喎。
咁啱行政會議成員陳智思間亞洲金融（662）前日亦委任公務員事務局前常任秘書長黎高穎怡做獨董，靚太黎高喺政府做咗超過25年，06年退休，家係中國神學研究院延伸課程主任，陳智思太太係虔誠基督徒，大家應該好啱傾。