同枱食飯，都要啱key先覺得好味㗎，所以當前晚建制派同狼振英飯局活動中，唔見自由黨田北俊蹤影時，唔少人都唔意外；大家私下仲開盤，話田少會唔會又係好似前主席劉健儀咁，寧願食豬扒飯都唔出席狼英飯局呢？答案就係田少係寧願聽「大姑媽」Elton John唱好歌，都唔聽狼英彈舊調。
超悶飯局重彈舊調
唔少好事之徒，前日都諗住擔定凳仔，睇吓當田少喺飯局上遇上狼振英時，會擦出乜嘢火花？點知田少最後冇現身，令等睇好戲人士大失所望，質疑田少可能唔想對住狼英無胃口，所以索性no show，擺明當狼振英冇到，落佢面喎。
田少噚日自揭，當晚佢去咗聽Elton John演唱會，所以缺席狼振英同建制派飯局。嘩！乜狼振英咁冇吸引力㗎？田少叫大家唔好上綱上線，豎起手指公話Elton John演唱會無得頂，笑笑口話：「呢啲啱我年紀聽、唔啱你哋。」然後好開心咁走人，似乎仲陶醉喺Elton John嘅歌聲之中。
事實係：前有劉健儀寧食快餐店豬扒飯而拒會狼振英，難怪唔少人同八方一樣，猜測田少缺席動機。
八方聽聞，狼振英喺當日飯局只係重彈舊調，話會回應僭建醜聞，但又冇提出時間表，講嚟講去嗰三幅被，完全冇新料到囉；田少揀咗去聽歌，實在冇損失，相信佢張演唱會飛係真金白銀買番嚟、唔係呃番嚟，肯定聽得好舒暢，唔似得狼振英咁日日如坐針氈。
mailto:[email protected]