無綫06年落選港姐鄭嘉雯噚日下嫁晨曦足球會班主兒子周志豪，一對新人喺薄扶林伯大尼教堂舉行婚禮，新娘着白色婚紗，手戴卡幾嘅鑽石婚戒，馮仁昭發覺鄭嘉雯肥肥哋，似乎有啲孕味。新人同圈中人熟絡，十男十女嘅兄弟姊妹團都有圈中人，好似姚子羚、同屆港姐曾瑞珊同范振鋒等，就連挺住巨肚嘅周家蔚都畀面幫手做姊妹。
城城封大利是
鄭嘉雯接受訪問時話好感動，佢話老公係長子嫡孫又係獨子，好想幫佢生番一、兩個，咁家係咪有咗呀？鄭嘉雯否認：「冇，真係冇！今晚開始會努力，有會話畀大家知。」會唔會幫老公生夠一隊晨曦少年隊？鄭嘉雯講笑話唔想要一直減肥咁慘。佢哋夜晚喺金鐘萬豪筵開五十幾席宴請親友，方力申同霍震霆放低禮就走。有份踢晨曦B隊嘅郭富城，去活動前專程到賀，仲送上大利是賀新人。
洪天明原來係兄弟團，但佢申請免役開門儀式，話怕咗啲姊妹喎；夜晚仲見到洪金寶、高麗虹、大肚湯盈盈、佘詩曼同陳爽等到賀。
撰文：馮仁昭
