內地名導演馮小剛最近有套《1942》上畫，套戲講1942年河南大饑荒，人民逃難嘅悲慘故事，點知就係1942呢個數字，觸動到A股股民情緒，擔心上海綜合指數遲啲跌落1942點。
雖然滬綜指噚日重上2000點樓上，但A股股民今年已經輸到喊，早排網民不斷苦中作樂，笑言指數可能跌至1949全國解放、1937抗日戰爭、1911辛亥革命等歷史時刻，馮小剛套戲講饑荒逃難，股民覺得同佢哋輸錢一樣咁慘情。
有網民話：「人家在2011年4月上證3000點之上籌拍《1942》，（現在）讓股民恰好帶着1942點深度割肉的慘痛心情去體會1942年人們因戰爭災難而賣女的悲慘人生。」有人仲謔稱馮小剛係股神！