臨近年尾收爐，唔少財金圈朋友已經準備好下周放假鬆人，就算距離年底仲有至少6、7隻新股在排隊等出閘，大家都已經好似無件事咁，無心戀戰。回顧呢一年，Sell side當然是難捱，好彩仲有份工嘅，bonus都大縮水，聽聞唔少中資投行都諗縮數，內部盛傳要延派花紅，又或者分期出。這個冬天真係特別寒冷。
至於Buy side，情況都好兩極。上半年市況波動、民企走樣爆煲，唔少對沖基金只要揀中幾隻股份勁short，表現應該還可以；長線基金相反就輸到喊晒口。但到9月底開始形勢迅速逆轉，內地經濟回穩，港股成功突破，唔少之前唔計價掃貨的長線基金，即刻趁機買返晒上去，對沖基金反而反應唔切，挾死晒。所以過咗11月，長線基金芬佬已經可以坐住貨放假去，唔少對沖基金就仲係度平緊倉。
展望明年，市況點睇？大家好似仲無乜方向。芬佬朋友形容，市場大部人仍覺得如無危機突然殺出，港股是有調整無大跌。不過有投資者仍擔心有上市公司可能要在明年公佈業績前guide down預期，投資者仍然係好揀擇。
海迪