【銅鑼灣】泳兒近年事業發展冇乜起色，不過，佢感情生活就相當稱心如意，經常見佢同髮型師男友Ziv拍拖甜蜜蜜。好似大前日下晝五點幾，記者又見佢同男友喺銅鑼灣恆隆中心嘅Francfranc買家品。
購物自己畀錢
泳兒揀咗個擺放雜物嘅白色籃，雖然係佢自己畀錢，但男友就好體貼咁幫女友排隊。買完嘢，泳兒人有三急去咗廁所，Ziv就入咗去Starbucks買咖啡邊飲邊等女友。仲記得上個月記者又係喺呢度遇見Ziv飲咖啡等泳兒去廁所，而且泳兒又係去足成十分鐘，又難怪Ziv每次都買杯咖啡坐低慢慢等，似乎呢個係佢哋拍拖嘅指定動作。
去完廁所後，泳兒同男友行去利園方向，雖然泳兒係公眾人物，但佢冇有怕照同男友手拖手，真係好溫馨。之後兩個行咗去家品店HOMELESS揀家品，但揀咗半個鐘都係冇收穫。
採訪、攝影：梁繼光
