蘋機會：潮人潮App　衫褲玩Tag

越嚟越多人鍾意得閒Upload張相上Instagram或FB，再加句短語扮文青；但扮得多都厭，潮人新寵係《TICKaLOOK》，一個謝絕文藝，俾你攞正牌Showoff品味嘅新潮App，6號同Evelyn更係忠實Fans：「一方面可分享自己型Look，另方面可參考他人Taste！」兩位潮人齊齊俾Like。

記者：韓繼聰　攝影：林栢鈞

場地提供：Royal Feast-The Private Kitches（6255 1628）

6號：時裝看生活

自言唔係潮人嘅6號，對玩《TICKaLOOK》有一番體會：「以前可能要人哋（雜誌）覺得你型，先影你、登你，但家只要你覺得自己型，就隨時可以Post自己，對潮流嘅主導性完全唔同咗。」
除咗睇人哋打扮，6號更愛從中窺探別人生活：「好似睇內地女仔嘅相，你會發現佢哋好多已經比香港更潮更型，可以想像到內地發展嘅急速；又試想呢個App繼續玩落去，你就可以睇到別人同自己喺Taste，甚至身形上嘅轉變，其實係好有趣嘅生活記錄。」6號更特別推介網頁版中的Fashion WIKI專頁：「其實Fashion除咗『追』，一樣可以認真認識，着一件衫之餘，知道埋佢背後嘅文化同故事，我覺得仲型！」

6號話佢唔算勤力，多數都係出Show、影相，有特別Look先Post。

Fashion WIKI介紹了不少時裝Items的故事，追潮流之餘不妨多認識潮流。

自言少擺相，但Rubber Band其他隊員就常玩。

Evelyn：交流心得　自設置裝Catalog

講到潮流，做Model兼讀Fashion嘅Evelyn當然係尖端，《TICKaLOOK》更係老早開始玩：「由佢得個網站時已開始玩，到家年幾都有Keep住一、兩日Upload一次，好勤力㗎！」
鍾意玩《TICKaLOOK》，都係鍾意同人交流潮流心德：「可能自己讀Fashion，有人Like甚至跟自己着衫，會好有成功感！另外，以前睇時裝雜誌都係以外國為主，但身形唔同，想跟都唔得；呢個App就以港人為主，大家身形差唔多，分享都易啲！」Evelyn對呢個App更諗出「獨家」功能：「個App好似係一個私家Catalog咁，買衫前睇下自己Upload過嘅相，買同款衫嘅機會大大降低，你知女仔買衫有時好盲目㗎嘛！」女生們大可效法一下。

Evelyn自言玩得好勤力，一兩日就會Update一次。

時裝小店Post係佢至愛，最易搵到心水衫。

Tag衫功能，幫佢記低自己買過咩衫。

跟玩！香港專屬時裝App

講咗咁耐，其實《TICKaLOOK》係一個Share自己潮Look嘅App，同一般社交Apps差不多，但《TICKaLOOK》就Focus喺衣着潮流，用家除自拍外，更可Tag番身上Items出自何方，同各路潮流新人、達人交流。網站兼App Founder阿Tim話：「其實外國好多呢類網站同Apps，既然香港人咁鍾意打扮，好應該有個自己嘅時裝App，為香港潮流做個記錄，同時希望香港潮人們更多認識同尊重Fashion。」