翠華茶餐廳（1314）老闆李遠康今年認真多喜事，年初嫁女，上月底茶餐廳成功上市，晉身十億富豪之列，聽聞佢呢個月30號仲會大排筵席娶新抱，做埋老爺㖭，話唔埋明年抱孫做埋公公、爺爺都未定，恭喜晒！
麗思卡爾頓 筳開50席
李遠康位二公子李祉鍵（Kenji）幫緊阿爸打理茶餐廳，係翠華項目發展主管，佢同未婚妻Vivian揀咗喺九龍站環球貿易廣場（ICC）間麗思卡爾頓擺酒，筳開50席。查實Vivian上月底亦有出席翠華上市儀式，當時同李遠康一家已經好似成家人咁㗎喇。
Vivian之前喺銀行返工，家陣就專心籌備婚禮，咁都啱嘅，未來老爺家係上市公司主席，除咗飲食界，喺金融界亦有頭有面，呢個婚禮一定要搞到有聲有色先得。
Kenji家姐李倩盈年初出嫁時就曾經搞翠華花臣，中午喺灣仔翠華宴客兼影相，夜晚擺酒時就有翠華名物奶油豬招呼親友。聽聞Vivian仲度緊婚禮個rundown，會唔會又玩翠華花臣，晚宴時送上翠華名物，賓客應該要到時先知。
李華華
mailto:[email protected]