噚日港聞版提到，香港奶粉又斷市喇。事關我哋背靠祖國，飲嘅係東江水，亦都賺咗唔少人民幣，多得阿爺回歸15年以嚟嘅關照，日日放幾萬同胞嚟香港送錢畀我哋使。所以香港人要時刻感恩回報，有床位齊齊瞓，有奶粉齊齊飲。
藥房話最近有內地人抬價狂掃奶粉，搞到個別牌子斷晒貨。強國人咁樣塞錢畀我哋使，真係唔知點多謝佢哋好。吳爽噚日上到微博，認真見識到內地媽媽對香港嘅貢獻同恩情。其中嚟自深圳嘅網媽「會飛的小熊1981」上載咗一張相，展示咗屋企書架擺滿奶粉嘅壯觀景象。
「會飛的小熊1981」話自己洞悉先機，知道香港奶粉缺貨，所以一口氣買咗咁多返屋企。佢仲留言話：「現在每次回走幾家都沒有，價格也越來越貴！現在大陸人都過去買，奶粉俏呀！」另一張內地媽媽post出嚟嘅相片就顯示，有人買咗成打奶粉返大陸，嗰種豪氣法，真係比死乞爛乞先乞到一罐奶粉嘅港媽高幾班。
奶粉當聖誕禮物
聖誕就到，有內地團購商家仲賣廣告，推銷奶粉聖誕套裝，199人仔，有奶粉、藥物、零食同化妝品。原來奶粉已經成為聖誕禮物，咁以後賀年、中秋、清明等等傳統節日，都可以考慮送奶粉應節喇。
講咗咁耐，可能有讀者詛咒緊班強國婦虧空晒港B嘅食糧，不如我哋睇埋廣州網友「吳音粵聲」嘅心聲再作結論：「毛時代大陸人逃港，香港人全都包容了，今天為何香港人不包容？……我也去香港買奶粉，我為何去香港買奶粉？因為在大陸我敢信邊個呢？龍應台講的對，雖然今天我們優雅了，但昨天的我和今天的你一樣！1949年以來，大陸沒進行國民教育！這麼多年來大陸教育的核心是『活下去』，其他都見鬼去吧！」
