周一英超，紐卡素全靠丹巴巴亞梅開二度，主場以3:0大勝韋根；不過，丹巴巴亞嫌紐記人工低，加埋佢嘅買斷費只係750萬鎊（約9,400萬港元），有傳阿仙奴想出手搶人。面對班主唔肯開水喉，愛將又想另謀高就，領隊柏度真係左右做人難！
助紐記止瀉炒韋根3:0
今場比想像中易踢，紐記嘅柏比斯施斯喺12分鐘博到韋根嘅美羅費古羅亞犯天條，獲得12碼之餘更令後者被逐；由於劊子手賓艾化受傷，前鋒丹巴巴亞操刀射入，為紐記領先1:0。踢少個嘅韋根陷於劣勢，丹巴巴亞喺21分鐘再入多球，加埋新仔比堅尼馬拿射入世界波埋齋，紐記最終贏3:0，終止咗聯賽4連敗嘅頹勢。
丹巴巴亞梅開二度後，聯賽入球去到10個，同蘇亞雷斯、尹佩斯同米捷並列榜首；而且佢仲係繼舒利亞之後，第一位連續兩季入球達雙位數嘅紐記球員。但現實好矛盾，丹巴巴亞表現越好，柏度就越煩惱；因為呢位塞內加爾射手嘅買斷費只係750萬鎊，引嚟越來越多球會垂青。
傳阿仙奴1月出手
柏度一早就想同丹巴巴亞續約，順便取消埋買斷費，但後者嫌家5萬鎊周薪太低，希望加到上7.5萬鎊，但球會唔肯，件事仲俾傳媒爆埋出嚟，搞到柏度煩上加煩；佢感嘆：「佢份約的確有買斷費，我哋一直都好想剔走，但仲未做到；買斷費呢個條款令到我、丹巴巴亞同球會都好痛苦。但無論點，我喺丹巴巴亞眼中只係見到佢想留隊，佢愛呢度。」但究竟呢份愛有幾深，相信1月自有分曉，因為有傳阿仙奴會出價，仲開出6萬鎊周薪斟丹巴巴亞。
除咗丹巴巴亞，呢場比賽仲有個焦點，就係幫紐記射成3:0嘅比堅尼馬拿。呢位19歲中場上季踢高雲地利，贏咗英冠最佳新人獎，今夏轉投紐記，喺聯賽同歐霸都有上陣；今場嘅世界波除咗係佢嘅英超第1球，仲令佢成為首個喺英超入波嘅布隆迪球員，為國爭光。
