TVB是藝人艾威的初戀情人，17歲簽約，一做33年，今年三月過檔城電，卻遇上免費電視台發牌風波。他早前為新情人走上街頭，為「第二春」發聲；對於「前度」，艾威明白山水有相逢，盡量不批評，但一直要用側門出入大樓的冤屈氣，卻不得不令他多吐幾句苦水。
城電人工高福利好
過檔魔童旗下的新電視台半年，「綠葉王」艾威正忙於接拍新劇《三面形醫》，首度擔大旗，戲份雖比不上靚仔小生林文龍，但好歹也是三面形醫其中一面，「未返新工前一個人去咗檳城減肥，日日將減肥相放上微博，唔成功唔返香港！」
破釜沉舟，何止瘦身，還包括離開打了33年工的初戀情人。他坦言從無想過，男人五十，「仲有得揀」，福利好、人工高。
他在藝人之中一直敢言，笑說無意批評「EX」，也深明阿媽教落、山水有相逢是硬道理，但訪問時也多說兩句，只因想闡明一台獨大下，除了既得利益者，無人有運行。
「好多人都唔知，將軍澳電視城主大樓有兩道門，我哋以前由藝人到掃地阿姐，都只可以用側門出入，正門只有方小姐同邵爵士咁嘅級數嘅大人物先可以用。我曾經有過一個瘋狂諗法，好想去平機會投訴。一座大廈，你都唔會要求個外傭只可以行後門出入喇？但你知投訴嘅話，以後你連側門都冇得入。只要走出呢個門口，幾鍾意拍劇都好，你都要轉行，因為香港再冇電視劇畀你拍」。
離開沒有半點後悔
毅然出走，切斷33年的感情，艾威笑說半點後悔都冇，只有感恩，「係意料之外嘅新生活」。他表明會繼續為「第二春」發聲：「開放市場，百花齊放梗係好，當個餅做大咗，節目質素提升，觀眾自然會追番電視，對行業、對觀眾都係好事……或者有人仍然唔敢出聲，怕發牌有變數，會前無去路。但講真，如果我唔係因為厚道、或者唔想傷害人，而係因為恐懼噤若寒蟬，呢一刻，我會感到慚愧」。
記者 呂麗嬋