正當港人被大話精狼振英激到㷫烚烚，叫佢落台之際，正在訪京嘅政制及內地事務局局長譚志源，噚日一見完港澳辦副主任華建，即自動波轉述北京聖旨，話中央會一如既往「堅定支持」特區政府同狼振英。點知講完呢句唔夠兩秒，一幅代表香港、即有飛龍標誌嘅易拉架突然自我摺埋，嚇到譚志源即時擰轉身，望望後台究竟出咗咩事。
難得譚局長之後仲識搞爛gag，話華健其實喺個人層面亦對佢有指示，就係希望佢keep fit，「喺任何情況，都唔會受驚過度，可以有比較好嘅抗疫能力」，睇嚟港澳辦都知道喺大話英治港下，特區官員冇乜好日子過喎。