早排喺電視播出嘅《最佳男主角》，由資深主持黎芷珊訪問多位殿堂級男星，大獲好評。德甲拜仁慕尼黑都有樣學樣，同德國一間電視台合作，請咗位金髮靚女模特兒天娜（Tina Kaiser）做主持，專訪隊內球員；第1集就搵咗謝路美保定，大談平日生活趣事。天娜喺當地都幾有名氣㗎，曾經主持過唔少大型騷，又拍過寫真，最重要係佢有「拜仁史上最索女粉絲」美譽，由靚女球迷訪問當紅球星，夠晒噱頭，收視應該會好好喇！