咁早就嚟魚蝦蟹？好似農曆新年都未有耐喎！中國人嗜賭、愛吃，將兩者合二為一，就成為了這個魚蝦蟹煲仔飯，生猛海鮮、魚香鑽入飯粒及飯焦間，嗰股鮮美，真係無得輸。仲要只係$48就可以喺銅鑼灣鵝頸橋底搵食，消夜開飯唔使走去山旮旯，大家買定離手喇喂！
記者：朱崇德 攝影：潘志恆
1. 清蒸花蟹川煲飯$68
六両的小花蟹，切件後令蟹水蟹油完全走入飯中，煲底不斷收乾蟹水，煲中的飯鮮甜得不得了，比蟹粥更勝一籌。
2. 豉汁鯰魚川煲飯$48
10斤重的大鯰魚，魚邊有層厚油，魚油流入飯中令飯滲透着魚香，不宜用辣味太重的豉油，否則蓋過魚鮮味。
3. 剁椒海蝦川煲飯$68
剁椒係湖南的特色調味料，味道微酸勁辣，放在開邊蝦面，經飯一蒸，連蝦殼味都逼入飯內，嗜蝦者必食。
香料豉油辣辣煲仔飯
未食魚蝦蟹煲，先講市況！幾十年前煲仔飯係北菇雞、鳳爪排骨主導，今日仍然係！不過冬菇少咗、鳳爪變單腳怪雞，旺區平均$50起跳，加臘腸、膶腸再加$5，我係極愛此道，好鍾意嗰種風吹腳底陣陣凉、飯香撲臉熱騰騰嘅感覺，不過真係無乜變化，令人食慾大減！
無聊走去駱克道鵝頸橋底一心諗住食辣蟹，點之發現側邊嘅川味港，竟然有這個甚具名堂的魚蝦蟹煲仔飯，老闆威哥話：「係班爛賭Friends，過完大海諗出嚟，但食落又真係幾好味道，於是放入Menu！」
老實！小店係以川辣風味聞名，所以呢度個豉油都係特香特辣，由十多種香料、辣椒爆香製成，當我灑煲仔飯豉油一刻，竟然發現汁水中有勁多料頭，我就知道有料到：「基本材料有薑、蒜、乾葱、洋葱、尖椒、花椒、野生椒、泡椒、子彈椒、冰糖等（聽講仲有秘製香料），以六分水、四分豉油煮成！」
威哥爆香所有香料，就足足用了半個鐘時間：「其實香嘅成份居多，味道偏中小辣，水份是預計了煲仔對水份蒸發，唔會令豉油過鹹，冰糖嘅甜潤，亦令食物更惹味更易入口！」咪睇威哥好似粗人一個，其實佢係出身嘉湖海逸酒店，跟60多歲老川人學做川菜，香料使用甚具一手：「我記得當日師傅教我煮魚香茄子，其實這道是川菜，原菜並無鹹魚或任何肉食，要做到菜中無魚，煮出魚味來，執着的是『鹹鮮』兩字！魚的味道原本就好抽象，尤其個鮮字！如何用香辣的味道做到這點，就係大師傅！」
想勁辣要出聲
吃上一口這個煲仔豉油，香辣味道好複雜，少少甜味的串連，令入口更順喉，花椒、青椒香味甚突出，形成一股鮮味；辣味係由多種辣椒組成，唔係死辣，當中有味道的變化，不過我覺得唔多夠辣，「要辣可出聲！我們會再加秘製麻辣醬！」我建議係叫中辣即可，據知真川人來試這裏的勁辣，都大讚有真川菜風味，不過半煲飯未吃完，就叫冰水埋單了！
