【本報訊】「第一期《米芝蓮指南》喺香港推出後就唔睇，因為佢哋唔識食」。食家李純恩批評，源自歐洲的《米芝蓮》品評歐洲菜式眼光獨到，具參考價值，但評審明顯不太懂中國菜，尤其中國地大物博，各省各分菜式均具獨特之處，情況就如日本菜般，「《米芝蓮》喺日本都唔係好受歡迎㗎」。
他說雖然《米芝蓮》近年聲稱已委任中國人任評審，「問題唔係乜國籍，係佢識唔識食。好似福臨門咁，如果佢都攞唔到3星，唔明點解其他食肆可以攞到囉。我覺得利苑ifc都好值得攞3星㗎。（現獲1星）」。他認為，食肆不用太介懷《米芝蓮》評級，「因為其實有幾多市民真係攞住呢本書去搵食吖，遊客就可能會」。
周中：呢啲星唔要就罷
名廚周中師傅則稱，《米芝蓮》往往只着重食肆門面裝潢，食物質素反而其次，故摘2、3星食肆大多是酒店餐廳等，「啲評審去到香港出名中式食肆，可能見到多數係年老嘅夥計，或者寸寸哋，梗係唔會畀3星啦，最多畀1粒。呢啲星唔要就罷啦」。