這兩周英超及西甲陸續有教頭被炒，但效果迥異。到底甚麼因素才令炒教練成靈丹妙藥？一是新帥有支「神仙棒」，揮一揮便可起死回生，令殘隊一夜間變成長勝之師；很可惜，暫未有人擁此神仙棒。
第二，是有支「打狗棒」，以其名氣威望，可鎮軍心。昆士柏流浪的哈利列納，以及西甲愛斯賓奴的艾古爾，可算此類。結果，兩支英超及西甲包尾球隊，新帥上任後首仗士氣明顯改善，均保不敗。
其實新帥能否使出「打狗棒」，常非個人能力決定，而是形勢使然。通常前任領隊與球員交惡，軍心渙散至戰績低落；做班主一係炒晒成隊波，一係炒個教練，梗係後者符合成本效益！結果很多時新帥蹺埋雙手，戰績都會提升。如NBA季初的湖人，炒掉熱身賽8連敗、開季5場輸4場的米克布朗後，新帥迪安東尼未親自督師，球隊已經兩連勝。其實喺頂級球隊做教練真係好難，除咗睇老闆頭，班「下屬」都可攞你命！
還有一例，就是乜棒都難救，如車路士的賓尼迪斯。前任迪馬堤奧無論在球員以至球迷心中都地位崇高，被炒後全隊都處於不滿狀態；加上個人認為肥賓執教功力一向麻麻，上任後3仗未勝，今晚歐聯又隨時贏波出局，睇嚟未必坐得耐。
講到炒教練，各地聯賽都不及意甲「樂此不疲」。英超西甲最近先炒咗兩件，但意甲早於開季第3周，便率先有巴勒莫的辛連奴被炒；至今已有基爾禾、卡利亞里、熱拿亞及佩斯卡拉共5隊曾換帥，繼續保持歐洲教練「最低工時」紀錄！