過往喺中央政策組鬱鬱不得志嘅邵善波，喺狼振英登基後受惠上位，做咗中策組揸fit人。同狼振英有別嘅係，邵善波明顯係真小人，所以唔介意畀人知佢要擴權，難怪開始被政圈中人封為「小人波」，同「酒駕波」互相輝映。唔少人開始動員全城踢「波」；佢面對被踢走危機，唔知有乜反擊？
周五請願 抗中策組橫行
小人波擅自加開中策組全職顧問職位，唔少泛民中人㷫過辣雞，民主黨唔單止反對開位，卿姐仲預告下屆要喺預算案cut走成嚿中策組，唔畀小人波亂咁嚟。學聯亦會唔放過「踢」波機會，秘書長李成康透露，已經聯絡政黨及唔同院校教職員，周五一齊去政總請願，抗議中策組橫行、強奪學術研究審批權。
八方聽聞，籌辦緊元旦反梁大遊行嘅民間人權陣線，亦考慮喺遊行中加埋反中策組嘅元素，事關小人波真係連公職人員任命權都要過問，唔通真係以為香港佢話事呀？有人直程想踢走小人波㖭呀。
狼振英僭建醜聞未平息，小人波竟然另點政治火頭，唔少政府中人都大嘆無奈。有政府中人話，每次見到電視有「波兒」蹤影，心跳一定加速，事關唔知佢又有咩偉論。據聞佢之前上立法會小組答問、以及接受電視台訪問，都係自告奮勇，睇怕佢真係鬱結太耐，一朝得志，語無倫次！
mailto:[email protected]