邵善波、張志剛等梁朝國師，他們一套政治工作規劃，例如政府要打輿論戰，要培植自己人，要有固定合作智庫，理論上係成立，可惜一旦在香港落實，便會走晒樣，講到尾最根本原因係自八十年代以來，走親中建制路線的人，食相及賣相太差，至今仍不為中產主流接受。
親中陣營有位上無人格
親中陣營欠缺政策及政治論述能力，係有先天因素。政治人才冇可能由溫室培育，必須幾經考驗才能成為人才，如果你冇能力同陳雲辯論城邦自治論，淨係識做應聲蟲同舉手機器，即使花大量政治資源，分派公職委任，最終都係一條蛋散。李慧琼相比同年代泛民，所擁的政治機會差天共地，城規會、立法會、行政會議手到拿來，但她究竟是否成才？大家有目共睹，她的政治論述能力比陳淑莊低幾皮。
冇獨立的政治人格及思考，無論梁振英動用多少行政資源去扶植，都只係溫室小花，即使形象上經包裝後，已脫離昔日土氣左派大娘，變身本土中產專業女性，但最後仍然是面目模糊。
至於學術界及智庫中人，親中陣營早已大大條水喉射住，否則何來浸大當代中國研究中心，但大家睇睇薛鳳旋搞出乜嘢水平研究？一本偏頗左傾國民教育手冊，將政府準備上馬之國教打下馬來；另一本藍皮書，則誣陷中文大學通識勾結外國勢力，引起本地學術界憤怒。邵、張主理一國兩制研究中心，究竟有邊一份公開的報告，引發過本地知識界討論。根據以往曾睇過一國兩制中心的政治報告，內容充滿鬥爭色彩，視香港為外國勢力大本營，左味十足，基本上同浸大當代中國研究中心水平接近。
呢堆已係精英，如果有待梁振英提拔的，等而下之，比邵、張、高又差一皮，更廢多幾錢重。放長雙眼睇清楚，呢棚人未來五年上晒位，梁振英政權等如建立在浮沙之上，大風大雨之時，便會立即崩塌，死得人多。
添馬男