踏入12月，唔少強勢股嘅頂位破完再破，成交又配合，睇嚟只要做吓功課，聖誕節前仍有機會食大餐。
將軍澳68A2地皮上周由麗新投得，而郭家大少郭炳湘亦認咗係投資者之一，麗新系股票即刻醒神晒，麗展（488）升16%創新高，而資產折讓七成的麗豐（1125）亦跟升咗8%。
講開麗豐，戰友都知道股價長期處於折讓，似乎市場仲係對岳少有戒心，但若果大家細心留意，管理層已經逐步做緊嘢。首先岳少唔再做主席，交棒畀年中先加盟嘅周福安，周福安以前做過嘉里（683）、領匯（823）同思捷（330）嘅CFO，同投資界關係好好，有助公司改善形象；另外麗豐近期密密沽出非核心業務，雖然金額微細不起眼，但方向似乎走啱喇，芬佬最鍾意專注本業，高透明度嘅公司，如果周福安搞得掂呢兩樣，估值自然大幅提升。近日股價突破，成交大增，但相信喺兩毫樓下吸納，仍有着數，目標先睇去年反彈高位0.23元，之後再睇0.25至0.30元。
唐牛