之前因應英超對碰，由昆士柏流浪對新特蘭，寫咗一個話題講護級宗師，主要介紹哈利列納同奧尼爾，其實小弟確有遺漏，要數英超嘅護級宗師，「大儍」艾拿迪斯認咗第2，仲邊有敢認第一。
或者「大儍」嘅足球風格唔係咁受觀眾歡迎，鍾意用傳統英式長傳急攻戰術，中後場全部都係打爛仔波嘅球員，好似佢愛將路蘭。不過喺英超呢個金錢掛帥嘅聯賽，最緊要可以留級玩呢個大富翁遊戲，「悶悶地贏」，比「過足癮輸」重要好多。
大儍由99年開始，一手一腳帶保頓升上英超，限米煮限飯，搵希亞路、迪奧夫、佐卡夫等失意軍人，都可以攞埋歐洲賽資格，之後都幫布力般流浪護級，睇番呢兩隊，大儍一走就先後降班，就證明佢嘅威力。好可惜執掌紐卡素期間，踢波風格不受喜鵲球迷同老闆鍾意，先要走人。
上季開始領韋斯咸由英冠打起，終於在附加賽勝出，重返英超，現時排名第8，比阿仙奴、利物浦等仲好，點唔到人唔服佢。上周六韋咸主場對車路士，又係大儍今季代表作，上半場示人以弱，俾車仔圍住攻，只係輸一球都算好彩，不過唞足精神下半場大反擊，換入迪亞美同馬菲泰萊， 中場活力當堂唔同晒，可憐賓帥仲未知衰，失番一球後先變陣，但中場控制權已經俾韋咸主導，車仔由主攻變番打反擊，球員心態調整唔嚟，最後大大鑊輸夠1:3。
不過護級宗師係唔係都鍾意收回佣？大儍同哈利列納都涉及過買賣球員非法回佣，或者呢啲就係護級代價。
文：牽牛