喺香港有好多粉絲、現職台灣文化部部長嘅龍應台（圖）一連6日訪港，唔少人對佢一直唔肯評論香港時局有啲失望。八方同行家噚日同佢茶敍，當然把握機會問佢點睇家台灣嘅反媒體壟斷運動、狼英僭建同埋反「蝗蟲」現象。
可能因為身份唔同咗，龍部長答得好小心。佢話資本家控制媒體唔止兩岸三地要面對，亦唔單純係中資嘅問題，而係全球嘅問題，將件事由反共提升至全球層面，搞到行家都唔知點反應。講到狼英僭建同埋中共有冇干預香港，佢就話自己好忙，香港嘅事佢已經甩甩哋，冇資格評論。咁咪即係「唔清楚，唔評論」？
八方同一班行家雖然唔想收貨，但正如台灣嘅學生所講，台灣嘅新聞自由由台灣人來捍衞，香港嘅民主自由講到尾都係要爭氣靠自己。