有睇開本欄的戰友應會留意到，魏力一向甚少推介光伏、風電等新能源股，一來走勢完全唔掂，二來坦白說，對有關行業的所知很有限，唔明基本因素都買的話，根本與賭錢無異，值博率低於五成，絕對買唔過。
既然明年以經濟復蘇為主調，向殘股出發，發掘未大升的潛力股，具一定值博率。魏力花了點時間研究太陽能股，搵到隻卡姆丹克（712），應有不俗升值潛力。
簡單而言，市面光伏股分為多晶硅（如保利協鑫，3900）、單晶矽（如卡姆丹克）及光伏建築業（如興業太陽能，750）。眾所周知，多晶硅價格過去兩年跌到阿媽都唔認得，協鑫自然冇運行，加上千層蟹貨，市值又高達200億銀，暫可不理。但原料（多晶硅）跌價，卻有利光伏建築股降低採購成本，對興能有利，但過去數月，股價已炒高一倍，值博率大減。
卡姆丹克主攻「超級單晶矽片」業務，是內地行業龍頭，訂價能力較高，晶片平均轉換率高達23%，遠超同業，毛利率保持15%，是前景最佳的企業。上半年實賺5820萬人仔，上季賺1482萬人仔，全年當賺1億人仔，約為2010年高峯前一半，現價僅為當時的四分之一，相當吸引！市場氣氛改善，買入中線博翻一番，應該不難。
魏力
http://www.facebook.com/2012jason