咖喱牛腩，有辣有唔辣。牽牛同咖喱將總結每周球賽，見到抵讚嘅事，牽牛定必重重有賞，用幾百字大讚吓佢；但見到抵鬧嘅人，咖喱就會毫不留情，省佢一餐。
曼聯今輪贏雷丁4:3，有個換人被視為好關鍵，就喺31分鐘，兩隊踢成3:3，費格遜換出拉菲爾達施華，換入基斯史摩寧，佢解釋話要加強防線嘅高度，先有呢個換人決定，但球員唔夠高真係失波嘅原因？拉菲爾又真係失波嘅罪人？我可憐拉菲爾就咁成為代罪羔羊。
第一個失波，雷丁喺曼聯右路傳中，莊尼伊雲斯將個波頂去遠柱，點知俾冇人嘜嘅笠臣簡奴射入。呢球一來輸在莊尼伊雲斯孤寒，唔肯頂個波出底線；二來點解笠臣簡奴冇人嘜呢？呢球明顯同高波冇關，係中場回防不力。面對傳中，艾拉移入中路幫手，呢個時候左翼嘅艾舒利楊格應該補番艾拉個位，但嗰陣楊格喺禁區外，遠到連鏡頭都差啲影唔到。
第2個失波，方祖接應角球，又係無人嘜咁頂入。首先，方祖得1米77，半隊曼聯都高過佢，明顯呢球係有球員冇追人，唔關高矮事。睇多幾次慢鏡，罪人係費查；佢原本喺遠柱嘜住方祖，但方祖突然走入中間，1米83嘅費查就企咗喺度。
第3個失波，1米88嘅莊尼伊雲斯唔夠雷丁1米94嘅桑摩利臣頂，被後者頂入。喺呢3個失波入面，得呢球係輸身高，另外兩球係輸在中場協防不力。睇番場波整體嘅數據，費查同艾舒利楊格今場分別有4次同3次失誤，係隊內最高嘅兩個，可見佢兩個今場狀態都唔好，精神又唔集中。今場曼聯破紀錄喺24分鐘內失3球，輸身高唔係主因，中場態度散漫先係真兇。
文：咖喱