經營「時間廊」同「眼鏡88」嘅寶光（084），上周引入江澤民長孫江志成有份嘅私募基金博裕，即時令市場刮目相看，就連寶光主席黃創增都話，好似由英甲，突然升呢加入英超曼聯集訓咁！
有如英甲仔升呢受訓
黃主席噚日度咗個比喻來形容呢單刁，話寶光好似一個好有天份嘅年輕足球員，本來踢緊英甲，突然決定要加入曼聯集訓，希望訓練幾年之後，可以升班喺英超做球星。至於同基金老闆熟唔熟？佢就話「自己識江志成、但江志成唔識佢」喎。
咁啱寶光揸住嘅手錶品牌「鐵達時」又推出新嘅長篇電視廣告，今次請咗以前拍過周潤發、梅艷芳經典廣告嘅金牌導演徐佩侃執導，故仔講一對老人家嘅愛情，黃主席話，呢個廣告令佢憶起爺爺嫲嫲，夠晒感動！