神秘「北大人」出沒注意！狼英治港搞到香港立立亂，江湖傳聞，深圳河以北呢幾日有位高官秘密嚟咗香港收風，證據就係有位姓陳嘅神秘政客，出手極為闊綽咁掃晒半山羅便臣道一間花舖嘅所有花，迎接呢位北大人，結果搞到街坊想買朵花都唔得。
八方根據街坊線報搵到呢間隱世花店。事頭婆話，前日的確有位唔知做過人大定政協嘅陳姓熟客，打嚟話要買花，叫佢即刻送去佢半山西摩道屋企，仲好神秘話夜晚有貴客到訪，雖然唔係豪到買晒全間舖嘅花，但淨係聖誕花同蝴蝶蘭都買幾千銀。
八方去到陳姓買花豪客樓下一望，原來屋苑通道鋪晒紅地氈，欄杆都用花球裝飾到靚靚。不過聽保安講係有住客嫁女先至咁鋪張，斷估北大人若要微服出巡，唔會「華麗地低調」咁蠢啩。