每個人心中都有個沈佳宜，而每個人心中都有一間米芝蓮，話咁快又一年，今天就是不少米芝蓮信徒望穿秋水，公佈2013年香港、澳門米芝蓮食肆的一天，自己的心水餐廳能不能摘星稍後自有分曉，今天我們就訪問了三位城中識食之人，看看他們心中的米芝蓮又意屬哪兒？
記者：歐陽曉思
攝影：蔡家輝、劉永發
蘇民峰：天香樓 蟹菜式一流
要蘇民峰選他的沈佳宜，相信非他的女友Lilian莫屬，至於心水米芝蓮，蘇師傅笑言最近成為「煮」家男人，沒有到處「留情」：「但呢一家餐廳唔去幾個月，我個人就覺得籮籮攣！」竟然有餐廳令蘇師傅如斯牽腸掛肚？「咪係尖沙嘴天香樓！我特別鍾意嗰度嘅醉蟹，醉蟹雖然係生蟹，但佢哋用花雕酒醃足一個月，包保無細菌，夠安全、夠衞生。而且酒味濃淡適中，蟹膏既香且甜，細細啖細細啖咁食，能慢慢享受蟹肉嘅鮮甜外，亦能夠食到蟹膏嘅甘香同陣陣嘅酒香，真係極品！」
天香樓一年四季均有大閘蟹供應，不同的季節去不同的湖取貨，他們勝在唔慳食材，蟹粉即日拆，因蟹腳肉帶黑，不夠靚，所以只用蟹身雪白的肉和膏做蟹粉，要十幾隻大約四両重的蟹，先可以做出一碟中份量的蟹粉。
蘇師傅更推介這兒的清炒蟹粉和蟹黃翅，蟹黃翅湯底係由大閘蟹肉、老雞同火腿熬製，湯底足料又鮮味，與一般的廣東翅煮法不同！至於蟹粉拌麪的蟹粉，全都用上蟹身的肉，吃起來鮮甜香濃，「蟹黃足，真材實料，真係可以食到滿口黃油，而最難得嘅係佢哋嘅麪都相當唔錯，軟硬適中，加上一啲自家蟹醋，更加能突出蟹粉嘅鮮味！不得不提，呢度炒嘅清菜亦屬佳品，試問由主菜到炒碟菜都保持一流水準嘅餐廳又有幾多間？只可惜米芝蓮嘅老外唔識貨！可惜可惜！」
天香樓（2366 2414）
地址：尖沙嘴柯士甸路18號C地下
馮美基：法租界 隱秘店嘆怪名菜
又愛煮又愛吃的May姐馮美基，經常跟朋友周圍吃，「要搵一間由第一個Course到第六個Course都好食嘅餐廳真係好難。最近朋友帶我到一間餐廳，結果喜出望外！那個地方是一間上樓的私房菜，地方隱秘，而外面無任何門牌，只有一扇白色大門，但餐廳裏面則非常Decent、Elegant，還有個開放式廚房，很有格調！」
以為餐廳漂亮，菜式亦沒有令May姐失望，「這裏是吃新式上海菜，從頭盤到甜品一共六個Course，沒有一個會讓你失望！」May姐特別愛餐牌上的菜式名，「上一次他們的Menu有道『竹小姐。大連先生。蓮霧。杞子。都半醉了』，原來是用上海八年花雕醉浸大連鮑魚，下墊竹小姐即鮮腐竹，盡吸花雕及鮑魚汁精華，酒香醇厚，伴碟的清甜蓮霧，中和酒的微微苦澀，食材配搭有心思，一問之下原來老闆以前是當廣告創意總監，從小到大熱愛烹飪，做了多年，覺得是時候發展自己的興趣，於是便以自己祖籍的菜式加點創意，研製出創意上海菜，而他鬼主意多多，所以每個名字都改得很有心思，我推介大家必試這裏的菜飯，一試難忘！」
法租界（3487 1715）
收費：$578/位 ＊六道菜，兩位起，須至少一日前預訂。
Gourmet KC：港灣壹號 小菜點心最耍家
近年熱爆的食評家Gourmet KC，自言一日食足六七餐，問他米芝蓮的心水，他笑言：「咁快又米芝蓮？我一直都有心水，就係君悅嘅港灣壹號！」Gourmet KC覺得港灣壹號的食物有水準，無論是點心還是小菜，均不賴，環境雅致，完全不明白為何得不到米芝蓮的青睞！
「幾年前識咗嗰度嘅行政總廚李師傅，佢有幾道拿手菜式屬坊間罕見，先係我每次必食嘅葡汁蟹箝酥，蟹箝全是新鮮貨色！」師傅將原隻鮮拆蟹箝放於酥皮撻內，再焗香，拿上手是熱辣辣、香噴噴的，一口咬下，酥皮咔嚓作響，入口鬆化牛油味足，內裏的蟹肉甚鮮嫩美味，配襯葡汁，味道很合拍。
另一道推介的是脆皮茶香雞，上枱傳來撲鼻的茶熏香，「茶香雞嘅皮脆薄如紙，皮同肉之間無脂肪，雞先炸後茶熏，味道帶煙熏香味，雞肉嫩滑，就算係雞胸肉都完全唔韌，仲好有彈性。」這裏的燒臘也是熱賣，當中不可不提蜜汁叉燒， 入口又滑又腍，十分入味。師傅指叉燒汁屬自家製，味道香濃，「焦邊、半肥瘦的叉燒加上蜜糖香甜，簡直一絕！希望今年他們能摘到星啦！」
港灣壹號（2584 7722）
地址：灣仔港灣道一號君悅酒店八樓