每一次屙尿，孫柏文都知冇得懷孕。今日突然講生殖，係因為近半年股價表現最優秀嘅股份之一，係做BB奶粉嘅雅士利國際（1230）。雖然之前有可口可樂收購滙源果汁（1886）觸礁，令滙源股價暴跌，不過雅士利就係咁傳會係外國大公司打入大陸市場BB奶粉嘅橋頭堡，所以長升長有。
點解要買現有公司，而唔直接同佢哋競爭？因為世界衛生組織有指引話各地政府要禁BB奶粉廣告，鼓勵人奶。
禁奶粉廣告 益雅士利
用香煙嘅經驗，當廣告被禁後，資訊流動性將大減，現有市場佔有率就唔會變，即未來參與者冇得靠資訊競爭。所以唯一能夠打入市場嘅方法，就係買現有競爭者。
每次話要箝制資訊自由，我就驚，希望最標榜保護資訊自由嘅毛孟靜出聲。世衛係由個港女head，都可以推一個「只要唔畀女人知，就係為佢好」嘅政策，點解冇婦權嘅人嬲？
你可能話：「都有男人想禁BB奶粉廣告喎！」冇錯，我都識唔少男人睇唔起女人嘅獨立思考，覺得佢哋會因資訊而被擺佈，唔好話BB奶粉廣告，投票權都唔應該畀佢哋。呢啲男人更冇得親身感受嗰刻冇奶水嘅抑鬱。有哋仲要係同孫中山先生同一個醫學院畢業，所以我叫佢哋做「扎腳派」。工聯會王國興都話奶水好。
所以，呢場封鎖資訊運動，係女人對女人，一啲自覺其他女人收資訊後就冇獨立思考、會被擺佈嘅女人搞。而通常女人打女人扯頭髮時，行埋去會好危險。最後，如果「扎腳派」贏，「女人越唔畀知越好」成政策，雅士利被收購就指日可待。大家要記得，當年可口可樂收購滙源雖不被批准而暴跌，不過係可口可樂話買滙源爆升先跌。所以炒呢個概念，要喺宣佈就走，如果唔係就分分鐘慘過個B肚餓個胸冇奶水。
孫柏文
http://facebook.com/shuen
本欄逢周二刊出