不過是大半年前的事，立法會專責委員會就西九規劃比賽事件召開研訊。黃毓民議員批評尚未黃袍加身的CY，對他當日身為評審，有否利益衝突的提問，回應來去就只有「不記得」、「不知道」和「不明白」。全無從實招來之意，更似拖延時間，耽誤研訊工作而冠以「三不」之名。
毓民若有預見力，應測算到CY豈止「三不」可數，起碼今日，港人皆知仲有呢一大「不」要同佢計清楚，咪就係「不存在」。選舉報名前早已知悉大宅內有僭建地庫，並匆促自行封閉。傳媒多番查詢，且信誓旦旦地庫之說全無憑據。而且反藉唐唐僭建一事，賊喊捉賊，造就對手的誠信危機，以求混水摸魚，坐享其成。最後就如田大少所講：「難聽啲（其實我覺得中聽），就係呃咗個行政長官嚟做。」實情如此。
「不存在」不要臉
其間屋宇署曾經四次去信要求提供資料，皆沒回覆，直到今時今日事件越鬧越大，不可收拾的情況下，先至採取行動打開呢個「消失的密室」，箇中原因難免惹人疑竇。係囉，何解嗰陣應付唐門行宮卻似「先下手為強」的使硬？不過點「硬」，亦不及CY嘅「夾硬嚟」。
其實那一年，董伯伯就已示範了一次這極其失敗的魔術表演──失驚無神就話畀啲港人觀眾知，緊緊握喺手中嘅嗰件「八萬五」道具其實已經「不存在」了。 大魔術師早在噓聲中退幕，想不到當日背後的助手，今天卻膽敢公然重施故技。僭建的地庫封了就不存在，那麼公款盜取後歸還就成不了虧空；貪贓雙開就不成枉法，咁都得？
呢啲連小學雞都識辨別嘅歪理，竟會出自一個國際都市的首長之口，作為這城的市民又點可輕易罷休。自身誠信有問題，還要一而再、再而三的掩飾、撒謊、隱瞞已經情理難容，還要編造這麼低檔次的謊言砌詞，直情係侮辱我哋嘅智慧，如此愚民，更加罪無可恕。
不過CY就真有他的本事，備受僭建醜聞纏身，處處迴避記者之際，出席總商會午宴卻與在場嘉賓言談暢甚。其間笑（難為仲笑得出）謂，政府施政要得到公眾支持，若有人阻礙政府推出政策，就要「Shout at them！」即係要向佢哋大聲呼喝。家陣施政裹足豈是外有阻礙之功，而是主事者無才無德「不要臉」（可謂「五不」）之故。
如果要重振政府管治威信，煩請眾矢之的自行了斷，不然港人只有續吼「Shame on You！」
盧先亞